894 8779 gudrun@jogafri.is

Jógafrí

Jógafrí

 

Jóga og sjálfsrækt við Gardavatn

með Sigríði Huldu og Guðrúnu Ingibjörgu

Ferð með þau fyrirheit að efla líkama, huga og sál!  Í sjálfsrækt verða umfjöllunarefni friður, íhugun, styrkleikar, gleði, jafnvægi, skemmtun, sérstaða, markmið,  flæði, núvitund, sóknarfæri, upplifun, slökun, hugsanir, viðhorf. Í jóga kynnumst við leiðum til innri hlustunar, friðar og sáttar við okkur sjálf og umhverfið.

Vikudvöl við Gardavatn á Ítalíu með morgunjóga, hugleiðslu og sjálfsrækt. Eftir hádegið heimsækjum við heillandi staði eins og Veróna og Feneyjar og bæina við Gardavatn. Síðasta dag ferðar heimsækjum við hátísku- og menningarborgina Mílanó.

Dagur 1 - flug út

Flug frá Keflavík síðdegis og lent á Malpensa flugvelli. Fararstjóri tekur á móti þátttakendum og við tekur rútuferð á hótel.

Dagur 2 - Njótum Saló

Að loknu jóga og morgunverði eigum við spjall saman þar sem við leggjum inn umhugsunarefni fyrir sjálfsræktina og ræðum komandi viku.

Hótelið er í bænum Saló við vesturbakka Gardavatnsins. Niður að ströndinni er 20 mínútna ganga frá hóelinu og þar er skemmtileg gönguleið með bökkum hins rómaða Gardavatns. Saló er um 10.000 manna bær og státar af dómkirkju í gotneskum stíl frá 15. öld. Þar við torgið er hægt að gæða sér á ís sem sagður er sá besti og rjómakenndasti við allt Gardavatn – ísbúðin heitir La Casa del Dolce eða Hús hins sæta. Þar er líka gamli bærinn og helsta verslunargatan, Via San Carlo, sem liggur frá dómkirkjunni að torginu Piazza Zanelli.

Saló bærinn er við suðvestanvert Gardavatn og þaðan ganga ferjur sem taka má til annarra bæja við vatnið og njóta fagurs útsýnis á leiðinni

Dagur 3 - Slökun eða kannski Sirmione?

Dagurinn hefst á jóga og eftir morgunmat förum við í skemmtilega sjálfræktarvinnu (1-2 klst) þar sem við skoðum styrkleika okkar, sérstöðu og sóknarfæri. Við endum stundina á að setja okkur markmið sem við höfum í huga fram að næstu stund.

Það sem eftir er dagsins er frjáls tími. Það er hægt að skreppa í hjólatúr, eða í siglingu með ferjunni sem siglir um vatnið til dæmis til næsta bæjar, Sirmione sem er fallegur gamall bær með kastala frá miðöldum og skemmtilegar litlar götur sem gaman er að þræða og kíkja í litlar búðir. Eða fara í göngu, taka strætó til einhvers bæjar í grenndinni eða bara slaka við hótelið. Í garðinum er sundlaug þar sem ljúft er að sóla sig.

Dagur 4 - Hin ljúfa og fagra Verónaborg

Dagurinn hefst á jóga og eftir morgunmat ræðum við markmið okkar frá deginum áður. Verkefni dagsins (1-2 klst) er að við skoðum mátt eigin hugsana og hvaða áhrif viðhorf okkar hafa á lífsgæði. Við endum á markmiðssetningu.

Um hádegi förum við með rútu til hinnar fallegu borgar Verona og njótum leiðsagnar um land og þjóð. Veróna er einstaklega rómantísk borg og þar má meðal annars líta hina einu sönnu Júlíu augum en saga hennar og Rómeós gerist þar. Einnig eru þar skemmtilegar götur, fornt hringleikahús frá tíð Rómverja, falleg torg og kastali við ána.

Castelvecchio kastalinn stendur við ána Adige sem rammar inn gamla bæjarhlutann í Veróna og rómantíkin svífur í lofti

Dagur 5 - Slökun, göngutúr, hjólatúr - eða?

Dagurinn hefst á jóga og eftir morgunmat ræðum við markmið okkar frá deginum áður. Verkefni dagsins (1-2 klst) er gleði og jafnvægi; hvaðan kemur gleðin,  hvernig nærum við hana og hvað vinnur með/gegn jafnvægi okkar í daglegu lífi? Við endum á markmiðssetningu.

Eftir hádegi er margt hægt að gera – fara í hjólatúr, taka strætó eða ferju í einhvern bæjanna við vatnið, skreppa til Bergamo sem er fallegur bær, kíkja á vínbúgarð eða bara slaka … Stætóferð til Limone – „sítrónubæjarins“, tekur um klukkustund og til Gargnano um hálftíma en báðir þessir bæir eru við vesturhluta vatnsins.

Dagur 6 - Hinar ólýsanlegu Feneyjar

Dagsferð til Feneyja – bæjarins á floti. Eftir jóga og morgunverð ökum við um sveitir og eftir hraðbraut til Feneyja. Þangað er um tveggja  klukkustunda akstur, en fer talsvert eftir umferð. Þar munum við spóka okkur í þessari skemmtilegu, hægsökkvandi borg, sigla í strætó eins og þar tíðkast, liðast um í gondól þeir sem vilja, skoða Markúsartorg og allar hinar fjölmörgu fallegu byggingar sem finna má þar í kring. Endilega að skoða Rialto brúna og Markúsarkirkjan er einstök en standa þarf í röð til að komast þar inn. Röðin gengur þó hratt en koma þarf bakpokum í geymslu áður en farið er í röð. Svo er líka gaman einfaldlega að rölta eitthvert og týnast og skoða mannlífið. Alltaf má spyrja til vegar eða feta sig til Markúsartorgs eftir merkingum.

Það er engu líkt að vera í Feneyjum og eiginlega alger nauðsyn að sigla um á gondól - ræðarinn er oft leiðsögumaður líka og gæti kannski brostið í söng!

Dagur 7 - Dagurinn er þinn!

Við hefjum daginn með jóga og eftir morgunmat förum við yfir markmið okkar frá degi 5.  Viðfangsefni dagsins er forgangsröðun þar sem við förum yfir nærandi og íþyngjandi þræði í okkar daglega lífi, hugsunum og venjum. Endum svo á samantekt fyrri vinnudaga (2 klst).

Það sem eftir er dags er frjáls tími. Það er margt hægt að gera – skreppa í  hjólatúr, taka ferju í einhvern bæjanna við vatnið, fara í létta göngu, eða bara slaka á í sólbaði ef svo ber undir… eða bara eitthvað annað sem til hugar kemur - dagurinn er þinn!

Dagur 8 - Mílanó og flug heim að kvöldi

Við kveðjum hótelið okkar og ökum til Mílanó sem er með fallegan miðbæ, ægifagra dómkirkju og kastala og kastalagarð, og fallegar verslunargötur nærri dómkirkjunni, þar á meðal er Galleria Vittorio Emanuele sem er yfirbyggð verslanagata úr gleri og stáli. Svo er um að gera að rölta um og líta augum hið fræga Scala óperuhús og Leonardo da Vinci styttuna þar nærri svo eitthvað sé nefnt. Einnig má spóka sig á hátískugötunum, í hinum svo kallaða tískuþríhyrningi borgarinnar sem er ekki langt frá dómkirkjunni.

Milano er töfrandi blanda af gömlum tíma og nútímaborg. Sforza kastalinn sem er hér í baksýn á sér langa sögu

Síðdegis förum við í rútuna sem ekur okkur út á Malpensaflugvöll. Þaðan eigum við flug og komum heim endurnærð eftir dásamlega dvöl. Einnig er valkostur að dvelja nokkra daga í viðbót í þessari mögnuðu borg - Mílanó en þá þarf að koma sér á flugvöll á eigin vegum með lest, rútu eða leigubíl.

Þátttakendur námskeiðsins kynnast kundalini jóga og hugleiðslu og vinna verkefni til að auka sjálfsþekkingu sína, greina áreiti í eigin lífi og átta sig á eigin viðbrögðum við álagi. Leiðir til að forgangsraða og viðhalda jafnvægi í daglegum verkefnum jafnt sem á álagstímum eru ræddar ásamt heppilegum næringarlindum og bjargráðum á álagstímabilum. Fjallað er um jákvæða hugsun, eigin viðhorf og lífshætti án steitu. Slökunaræfing er kennd.

Kennarar:

Guðrún Ingibjörg Hálfdanardóttir, leiðsögumaður og jógakennari

Sigríður Hulda Jónsdóttir, ráðgjafi og eigandi SHJ ráðgjafar

 Tími: 5.-12. september 2020

Verð: Í tveggja manna herbergi: 205.000 kr.
Ein/n í tveggja manna herbergi: 230.000 kr.

Bóka ferð og fá nánari upplýsingar: gudrun@jogafri.is