894 8779 gudrun@jogafri.is

Jógafrí

Jógafrí

Jóga- og sjálfsræktarferð – Tenerife

Í samvinnu við SHJ ráðgjöf

Við eflum líkama, huga og sál! Allt þetta í einni ferð: Friður, íhugun, styrkleikar, gleði, jafnvægi, skemmtun, sérstaða, markmið, flæði, núvitund, sóknarfæri, upplifun, slökun, hugsanir, viðhorf.
Á eyjunni Tenerife þar sem er eilíft sumar býðst að dvelja og iðka morgunjóga, hugleiðslu og sjálfsrækt. Tíminn frá hádegi er svo laus í að gera hvað sem er, eins og að slaka á, sóla sig, rölta í bæinn, fara í gönguferð, taka stræó í aðra bæi, taka kláf upp á El Teide eldfjallið eða…

Dagur 1

Flug frá Keflavík klukkan 10:20 og lent á Tenerife kl. 16:10. Við tekur rútuferð á hótel sem tekur um 45 mínútur. Hótelið La Troya er staðsett alveg við strönd og á Playa Las Americas svæðinu sem er á syðri hluta eyjarinnar. Tenerife er stærst Kanaríeyja, rúmir 2000 km² að stærð, sem er álíka og Snæfellsnesið okkar, staðsett vestan undan ströndum Marokkó í Afríku. Á eyjunni búa tæplega 900.000 íbúar. Hún státar af mörgum ströndum sem ýmist eru lagðar dökkum eða gullnum sandi. Á suðvesturströnd Tenerife eru vinsælu strandsvæðin þrjú: Costa Adeje, Los Cristianos og Playa de las Americas. Hér er hvað mest veðursæld á Tenerife en eyjan býður ýmislegt fleira en frábært strandlíf því náttúra eyjarinnar er falleg og fjölbreytt. Hótelið okkar liggur nærri ströndunum tveim, Playa de las Américas og Costa Adeje.

Dagur 2

Við byrjum daginn með jóga og morgunverði og síðan hefjum við sjálfsræktarnámskeiðið þar sem við leggjum inn umhugsunarefni fyrir sjálfsrækt og ræðum komandi viku.

Síðan er dagurinn laus til að gera það sem hugur girnist. Á Tenerife, er árlega haldin ein af stærri kjötkveðjuhátíðum í heimi með skrúðgöngum og skringilegheitum. Þennan dag, 7. febrúar er til dæmis hægt að skreppa til Santa Cruz, höfuðborgarinnar á eyjunni, en þar verður kunngjört val á drottningu karnivalsins og örugglega mikið um dýrðir! Ferðalag til Santa Cruz  tekur 1,5 klukkustundir með strætó. Meðal annarra atburða á hátíðinni í Santa Cruz má nefna skrúðgöngu (13. feb.) og jarðarför sardínunnar (14. feb.) – en eins og nafnið bendir til þá er stórgerð sardína þar í aðalhlutverki sem borin er um götur og að lokum lagður eldur að. Í kjölfarið fylgir flugeldasýning sem markar lok hátíðarinnar. Santa Cruz er staðsett á norð-austurhluta eyjunnar. Hún er næstfjölmennasta borg Kanaríeyja og iðar af mannlífi. Í borginni eru skemmtilegar gönguleiðir, fallegir garðar, fjölbreyttar verslanir, skrautlegir listamenn og nútímalegur arkítektúr.

Það sem skoða má í borginni er til dæmis Listahöllin (Espacio de la Artes) sem er í nýstárlegri byggingu við San Sebastian breiðgötuna. Þar er undir einu þaki listasafn, ljósmyndasafn og bókasafn auk reglulegra annarra listviðburða; einnig er þar lítið leikhús, nokkrar verslanir og veitingastaður. Fyrir ferðamenn er sérstaklega áhugavert að sjá ljósmyndasýninguna en þar eru eingöngu myndir frá Tenerife.

Tenerife höllin (Auditorio de Tenerife) er einnig merkileg bygging, víðfræg fyrir arkitektúrinn og geysifallegt hús sem minnir helst á segl gamalla skipa. Þar fara fram ráðstefnur og ýmsir viðburðir og stórtónleikar.

Tvíburaturnarnir (Torres de Santa Cruz), voru tvær hæstu byggingar á Spáni fram til ársins 2010 en þá var reist hærri bygging í Madrid. Þeir sjást alls staðar frá en standa við Calle de Celia de Cruz.

Safn manns og náttúru (Museo de la Naturaleza y el Hombre) er gott náttúru- og líffræðisafn við Calle Fuente Morales. Vel þekkt fyrir safn af svokölluðum Guanche múmíum en Guanche voru frumbyggjar Kanaríeyjanna áður en Spánverjar komu til skjalanna. Það fólk smurði lík látinna ekki ósvipað og Egyptar gerðu og allnokkrar slíkar grafir hafa fundist á öllum eyjunum.

García Sanabria garðurinn (Parque García Sanabria) er miðsvæðis í borginni og kærkominn staður til að hvíla lúin bein eftir göngutúr undir heitri sólinni. Garðurinn geymir einnig grasagarð og er auðfundinn við Römblu Francos hershöfðingja.

Spánartorg (Plaze de España) er miðpunktur Santa Cruz og stærsta torg á öllum Kanaríeyjum. Þar er iðandi líf daga og nætur og gaman að sitja þar og skoða mannlífið.

Til norðurs frá borginni er falleg strönd, Playa de las Teresitas, og á henni er innfluttur skeljasandur. Þar er minna líf en víða annars staðar en hingað koma borgarbúir sjálfir til sólbaða og leikja. Flestar strendur Tenerife eru svartar vegna öskusands en ekki gullnar eins og margir búast við.

Dagur 3

Dagurinn hefst á jóga og eftir morgunmat förum við í skemmtilega sjálfræktarvinnu (1-2 klst.) þar sem við skoðum styrkleika okkar, sérstöðu og sóknarfæri. Við endum á að setja okkur markmið sem við höfum í huga fram að næstu stund.

Það sem eftir er dagsins er frjáls tími. Hægt er að fara í létta göngu, hjólatúr eða bara sóla sig og slaka … eða bara eitthvað sem til hugar kemur.
Ein hugmynd – fyrir þá sem finnst erfitt að vera kyrrir – er hugmynd að fara til næsta bæjar, Los Cristianos.
Bærinn liggur nærri Amerísku ströndinni og er örstutt í miðbæinn frá ströndinni. Þetta var fyrrum mikill fiskibær en með mikilli uppbyggingu hefur byggðin færst ofar í hlíðina. Margar skemmtilegar litlar göngugötur eru í bænum með litlum verslunum. Fjöldi ferðamanna leggur leið sína á ströndina sem gerir að strandlíf þar er líflegt. Þar má finna fjölmarga veitingastaði og kaffihús þar sem sólin skín allan ársins hring.

 

Dagur 4

Dagurinn hefst á jóga og eftir morgunmat ræðum við markmið okkar frá deginum áður. Verkefni dagsins (1-2 klst) er að við skoðum mátt eigin hugsana og hvaða áhrif viðhorf okkar hafa á lífsgæði. Við endum á markmiðssetningu.
Svo er dagurinn frjáls. Að loknu sjálfsræktarnámskeiði er dagurinn þinn … Kannski viltu bara slaka og njóta strandlífs?

Svo er líka hægt að fara eitthvert um eyjuna – kannski langar einhvern að komast nær drottningu eyjarinnar – sem er hið formfagra eldfjall Teide, hæsti tindur Spánar og gnæfir 3718 metra yfir sjávarmál. Teide er hluti af þjóðgarðinum Parque Nacional del Teide sem er á Heimsminjaskrá UNESCO. Eldfjallið gaus seinast árið 1909 og er eitt af stærstu eldfjöllum heims.
Byggðin á Tenerifeeyjunni hringar sig kringum eldfjallið en Tenerife þýðir Hvítafjall á máli innfæddra, tene: fjall; -ife: hvítur.
Langi þig upp á fjallið þá tekur bara átta mínútur að fara upp með kláfnum frá efra plani. Það er staðsett í 3555 metra hæð og þar má velja um þrjár leiðir – ein af þeim er gígur fjallsins og hæsti tindur Spánar – og undursamlegt útsýni í góðu skyggni. En hafðu í huga að þetta er mikil hækkun og það er kalt þarna uppi. Og það þarf að skrá sig með fyrirvara því aðeins ákveðinn fjöldi má sækja tindinn heim daglega! En viljirðu nota tvo jafnfljóta – og sem er kannski meira gefandi – þá má reima á sig gönguskó, taka með sér nesti og vatn og sólarvörn og sigra fjallið á fimm klukkustundum…

Dagur 5

Dagurinn hefst á jóga og eftir morgunmat ræðum við markmið okkar frá deginum áður. Verkefni dagsins (1-2 klst) er gleði og jafnvægi; hvaðan kemur gleðin, hvernig nærum við hana og hvað vinnur með/gegn jafnvægi okkar í daglegu lífi? Við endum á markmiðssetningu.
Þá er framundan dagur til að njóta. Slaka, sóla sig, ganga með Adeje ströndinni, lesa, fara eitthvert sem hugurinn girnist með strætó eða fara í eyjarsiglingu til Gran Canarie?

Dagur 6

Við hefjum daginn með jóga og eftir morgunmat förum við yfir markmið okkar frá degi 5. Verkefni dagsins er samskipti en þau eru stór hluti af daglegu lífi, og í þeim felast auðlindir og áskoranir. Ræðum mörk, gefandi samskipti og ólíka samskiptastíla.
Að því loknu tekur við frjáls tími. Það er margt hægt að gera – fyrir utan að vera bara slakur er hægt, fyrir þá sem vilja eitthvað annað en sólstrandarlíf að fara og skoða Masca gilið. Þá er tekinn strætó til fjallaþorpsins Masca og þaðan er hægt að fara í göngu niður Masca gilið sem tekur 3-4 tíma og endar við ströndina. Þaðan má taka bát til Los Cristianos – nenni maður ekki að ganga sömu leið til baka.
Masca, sem þýðir gríma á spænsku, stendur í 600 metra hæð yfir sjávarmáli og stendur hæst allra byggða á Tenerife. En það er líka bara gaman að koma og vera í þessu fallega þorpi sem státar af fallegu útsýni, kannski smá erfitt fyrir lofthrædda að keyra upp því vegurinn til þorpsins er brattur og þröngur. Í þorpinu búa um hundrað manns og yndislegt að una sér á röltinu og njóta þessa sérstaka þorps eða snarla á einhverjum veitingastaðanna þar.
En helsta aðdráttarafl Masca er þó gönguleiðin að Mascaströnd frá þorpinu. Gangan tekur frá tveimur stundum, fyrir þá sem eru í fínu formi, og upp í fjórar stundir fyrir hina. Á endastöð er komið niður á strönd sem er lokuð af klettum á báðar hliðar.
Hægt er að láta sækja sig á bát þegar komið er niður á strönd. Það kemur í veg fyrir að klöngrast þurfi alla leið til baka og þá upp á við.
Hafa skal í huga að taka með sér vatn og sólarvörn og eitthvað sem hlífir höfðinu gegn geislum sólar. Og auðvitað þarf gönguskó í þessa ferð.
Langi mann að skoða Masca þorpið en ekki í gönguna niður gilið þá er valkostur að taka svo strætó til baka til þorpsins Santiago del Teide en þar er skemmtilegt að ganga. Og þaðan má svo taka strætó heim.

Dagur 7

Að venju hefst dagurinn á jóga og síðan eftir morgunverð tekur við sjálfsræktarnámskeið. Viðfangsefni dagsins er forgangsröðun þar sem við förum yfir nærandi og íþyngjandi þræði í okkar daglega lífi, hugsunum og venjum. Við endum svo á samantekt fyrri vinnudaga (2 klst).
Og þá blasir við dagurinn – sem er algerlega þinn …

Dagur 8

Síðasti dagurinn okkar í ferðinni hefst með morgunjóga og síðan tekur við morgunverður. Dagurinn er frjáls þar til tími verður kominn til að kveðja hótel og taka rútuna sem flytur okkur út á flugvöll. Það er um klukkustundar akstur, flugið er kl. 17:05, og lent í Keflavík kl. 23:10. Þá skilum við okkur heim á frónið okkar kæra – velúthvíld og endurnærð á líkama, huga og sál …

Þátttakendur námskeiðsins kynnast kundalini jóga og hugleiðslu og taka þátt í sjálfræktarnámskeiði þar sem unnin verða verkefni til að auka sjálfsþekkingu, greina áreiti í eigin lífi og átta sig á eigin viðbrögðum við álagi. Leiðir til að forgangsraða og viðhalda jafnvægi í daglegum verkefnum jafnt sem á álagstímum eru ræddar ásamt heppilegum næringarlindum og bjargráðum á álagstímabilum. Fjallað er um jákvæða hugsun, eigin viðhorf og lífshætti án steitu. Slökunaræfing er kennd.

Kennarar verða Guðrún Ingibjörg Hálfdanardóttir, leiðsögumaður og jógakennari og eigandi Eilífðarsólar ehf. og Sigríður Hulda Jónsdóttir, ráðgjafi og eigandi SHJ ráðgjafar.

 

SHJ ráðgjöf sérhæfir sig í fræðslu, stjórnendaráðgjöf og stefnumótunarvinnu fyrir einstaklinga og fyrirtæki. Sigríður Hulda Jónsdóttir hefur um árabil starfað sem kennari, stjórnandi og ráðgjafi í menntakerfinu og var forstöðumaður Stúdentaþjónustu Háskólans í Reykjavík áður en hún stofnaði eigið fyrirtæki. Sigríður Hulda býður upp á fjölbreytt námskeið varðandi sjálfsrækt, færni á vinnustað, samskiptafærni og fleira. SHJ ráðgjöf hefur starfað með mörgum stærstu fyrirtækjum landsins svo sem Marel, Arion banka, Landsspítalanum, Háskóla Íslands, ÍAV o.fl.
Sigríður Hulda hefur setið í ýmsum stjórnum, leitt ráðstefnur hérlendis og erlendis og gefið út fræðsluefni sem þýtt hefur verið á nokkur tungumál.

Guðrún Ingibjörg Hálfdanardóttir hefur frá árinu 2015 staðið fyrir jógaferðum til Ítalíu. Guðrún er leiðsögumaður og kundalini jógakennari og sameinaði helstu áhugamál sín, jóga og ferðalög, í stofnun fyrirtækisins Eilífðarsólar í janúar 2017. Hún hefur kennt jóga hjá jógastöðinni Andartaki, Námsflokkum Reykjavíkur og í Nuddstöðinni Chakra í Hamraborg í Kópavogi.

Dagsetning:  Febrúar 2018
Verð: Í tveggja manna herbergi: 195.000 kr.
Í eins manns herbergi: 215.000 kr.
Innifalið: Flug, gisting, morgunverður, ferðir til og frá flugvelli; jóganámskeið og sjálfsræktarnámskeið.

Skráning: Guðrún Hálfdanardóttir – s. 8948779 – gudrun@jogafri.is